काठमाडौ, श्रावण २६ - सुनिता दुलाल करिब एक दशकदेखि तीजको उल्लास विदेशमै मनाउँदै आइरहेकी छन्। विदेशमै धेरैजसो व्यस्त रहने गायिका सुनीता दुलाल केही समयका लागि तीज गीत एल्बम निकाल्न मात्रै नेपाल भित्रिएकी हुन् भन्दा फरक पर्दैन।
यसपालि उनले तीजको दसौं भीसीडी एल्बम निकालेकी छन्। 'नाचौं सरर...' भीसीडीमा 'तीजको आयो लहर...', 'चुप्प मोइ खाउँला आमाको गालैमा...' गरी दुइटा नयाँ गीत सुन्न सकिन्छ। 'तीजको आयो लहर...' कुमार विवाहितले लेखेका हुन्। यसमा सुरेश अधिकारीको संगीत छ। 'चुप्प मोइ खाउँला...' चाहिँ महेश खडकाको रचना-संगीत हो।
'नाचौं सरर' मा दस गीत छन्। अन्य आठ वटा चाहिँ पुरानै भीसीडी कलेक्सन हुन्। ती हुन्: 'नाच्नलाई पैतला भाँच्नलाई कम्मर...', 'यस पालिको तीजमा...', 'सधैं तीजमा व्रत बस्छु...', 'अलि फरक भा'की छु यसपालि...', 'फूलबुट्टे सारी...', 'उनको लागि व्रत बसेको...', 'अब त मैले 'नि झुम्का लगाउँछु...' र 'पोहोरको तीजमा रातो थियो साडी...'।
यसपालिको तीज पनि उनी विदेशमै मनाउँदै छिन्, क्यानाडामा। अगस्ट २२ मा क्यानडाको क्यालगरीमा, २३ मा एडमन्टन, २४ मा लेथबि्रच र २५ मा अटोवामा उनी नाच्दै र नचाउँदै हुनेछिन्। भनिन्, 'दसैं र तिहार चाहिँ अमेरिकामै मनाउँछु।'
पछिल्लो समय विशेष चाडपर्वमा विदेशमा बस्ने नेपालीहरूले कलाकार र संस्कृतिलाई निकै सम्झने गरेको उनको अनुभव छ। त्यसैले तीजका मौलिक पहिरनमा समेत उनी ध्यान पुर्याउँछिन्। 'गीतसँगै पहिरनमा पनि तीजपना झल्काउने गर्छु,' उनले सुनाइन्, 'साडी मेरो बेस्ट पहिरन हो।'
उनले शिवजी, तीज र व्रतको सन्दर्भ कोट्टयाउँदै गर्दा आफ्नो बिहेबारे खुलाइन्। हल्का शाकाहारी खाना खाएर तीज मनाउने गरेकी उनले घरबाट उपयुक्त वर माग्न आए विवाह गर्ने सोच रहेको सुनाइन्। 'आउँदो वर्ष पक्कै बिहे गर्छु,' उनले भनिन्, 'अहिलेसम्म ब्वाइफ्रेन्ड बनाइएन। अब मागी बिहे नै गर्नुपर्ला।' करिअरमा असर पर्ने डरले प्रेमका लागि प्रस्ताव आउँदा पनि स्विकार्न नसकेको उनले खुलासा गरिन्।
-ईकान्तीपुर
Post a Comment