इराक: पश्चिमी इरानको इलाम प्रान्तमा सोमबार गएको भूकम्पमा परी कम्तीमा ४० जना घाइते भएका छन् । यस भूकम्पबाट ४० व्यक्ति घाइते हुनुका साथै सम्पत्तिको क्षति भएको, तर नागरिकहरुको ज्यान गएको समाचार भने हालसम्म प्राप्त नभएको राज्यद्धारा सञ्चालित टेलिभिजन च्यानलले जनाएको छ ।
टेलिभिजनकाअनुसार स्थानीय समयाअनुसार सोमबार बिहान करिब ७ बजे गएको सो भूकम्प ६.३ रेक्टर स्केलको मापन गरिएको अमेरिकी भौगर्भिक सर्वेक्षण संस्थाले जनाएको छ । यस भूकम्पको केन्द्रबिन्दु इराकको सीमानजिकैको दक्षिणपश्चिमी सहर आब्दानानदेखि ३६ किलोमिटर टाढा रहेको क्षेत्रमा १० किलोमिटर गहिराईमा रहेको छ ।
गतवर्ष पनि पाकिस्तानको सीमामा पर्ने दक्षिणपश्चिम इरानमा गएको ७.८ रेक्टर स्केलको भूकम्पबाट कम्तीमा ४० व्यक्तिको मृत्यु भएको थियो । सन् २००३ को डिसेम्बरमा इरानको दक्षिणी प्रान्त बाममा गएको भूकम्पमा परी २६ हजार व्यक्तिको मृत्यु भएको थियो ।
- रासस/एएफपी
Post a Comment